CONTINUACIÓN DO OBRADOIRO CON ABI CASTILLO

Logo da visita da ilustradora Abi Castillo continuamos traballando o retrato. Neste caso os nosos propios retratos.

Partimos dos cadros que enviara o departamento de educación do Museo Thyssen Bornemisza cos que xa traballaramos con Abi. Estudiámolos de novo e describímolos en todos os detalles que puidemos.

Despois mirándonos no espello fomos describíndonos, intentando explicar todos os detalles que viamos en nós.

A continuación fixemos os nosos retratos. Usamos como referencia a metade das nosas fotografías en formato DIN A3 e tiñamos que completar, como nós quixeramos, a metade que faltaba. 

Abi deixounos algunhas partes do rostro para que completemos os nosos retratos. Esta semana farémolo 👍

DESPEDIDA DE NINA

O pasado venres, 2 de xuño, Nina a auxiliar de conversa do CEIP Plurilingüe Enrique Barreiro Piñeiro, despediuse de nós, xa que volve á súa casa en Boston.

Na Modia tivemos pouca relación con Nina, pero no cole fixeron unha festa moi chula e baixáronnos hamburguesas para comer. Que ricas! 😋

CONTINUAMOS O NOSO MURAL EN PAPEL

Seguimos pintando o noso mural. Agora puxemos as nosas pegadas de pés. Seguiremos pensando que outras cousas poñer nel.

As pegadas dos pés foron moi divertidas de facer, porque o pincel facía cóxegas e escorregabamos ao pintar.

VAMOS AO CAMPING

O pasado mércores 31 de maio fomos de excursión ao camping "Os Fieitás" de O Grove, xunto coas nenas e a profe de Covas.

Foi un día emocionante no que xogamos na praia, no monte, comemos tod@s xunt@s (uns máis outros menos 😄). Volvemos moi cansados pero foi fantástico compartir todos xuntos esta experiencia.

Mellor non poñemos fotos da viaxe de volta, porque algúns viñan xa durmindo 😉

OBRADOIRO DE FISIOTERAPIA CON MARÍA

O pasado 30 de maio viñeron visitarnos María e Ángela.

María é fisioterapeuta (e quen lle pon ben as costas á profe cando está torcida) e veu ensinarnos a dar masaxes e a adoptar posturas correctas para que nós non teñamos dores nin de costas, nin de pescozo, nin de ombros...

Empezamos sentindo o nosos corpos e os dos compañeiros, notando a respiración e algunhas partes que se moven (os brazos, as mandíbulas..) Logo ensinounos a dar masaxes como se as nosas mans foran platiños voantes e serpes. 

Pola súa banda Ángela é farmacéutica e veu falarnos de para que serven os medicamentos e sobre todo que NUNCA NUNCA NUNCA debemos tomalos nós sós. Sempre cando nolos dean os papás, os avós... 

Moitas grazas a María e a Ángela.

Tamén a Pili e Mari Carmen (mamás de Sabela I. e Mauro), sempre dispostas a axudar. 

"CHEA DE VIDA" CON GUADI GALEGO

O pasado 15 de maio, no CEIP Enrique Barreiro Piñeiro, cantamos todos xuntos a canción de Guadi Galego: "Chea de vida", coa presenza da artista no noso patio.

Cantamos todos empregando diferentes linguaxes (linguaxe oral, de signos, pictogramas...). Foi moi emocionante.

Uns días antes viñera pola escola Thais, que fala a linguaxe de signos e xa signara esta canción de Guadi, a ensinarnos algunhas estrofas da mesma.

Grazas, Thais!